المشهد الاول :
خالد جالس فى العزاء توفى والده نتيجه مرض مزمن.
عمه امين: البقيه فى حياتك يا خالد.
خالد: حياتك الباقيه يا عمي.
العم: شد حيلك كده عشان تاخد بالك من والدتك مالهاش غيرك.
خالد: مسكينه امي الصدمه كانت جامده عليها. ربنا يقويها و يصبرها.
العم: لو عزت اى حاجه يا خالد اتصل بيا. اعتبرنى زي والدك بالظبط.
خالد: اكيد وربنا يعلم ان عشمنا فيك كبير.
ـــــــــــــــــــــــــــــــــــــــــــــــــــــــــــــــــــــ
المشهد التانى :
خالد ووالدته (الست رئيفة) داخل الفيلا بعد مرور سنة على الوفاة.
الام: خالد انت لازم تشوف نفسك و تتجوز عشان اطمن عليك قبل ما اموت. انا ماليش غيرك فى الدنيا و نفسى اشوفك سعيد و متهني.
خالد: متقلقيش عليا يا امي انشاء الله ربنا يسهل و اخلص الجامعة و بعدين يحلها ربنا.
الام: ربنا يهديك يا ابنى و ينورلك طريقك و يرزقك ببنت الحلال اللى تنور عليك حياتك.
خالد: ايوة كده ادعيلي ياامى انا مقدرش اعيش من غير دعواتك.
ــــــــــــــــــــــــــــــــــــــــــــــــــــــــــــــــــــــــ
المشهد الثالث :
خالد جالس مع ليلى.
خالد: ماما هتفرح قوي لما تشوفك انا كلمتها كتير عنك. انتي عارفه ماما على طول بتدعيلي انى الاقي بنت الحلال.
ليلى: المهم انت لازم تيجي تكلم بابا.
خالد: اه اه انشاء الله. يوم الخميس اللى جاي انشاء الله هاجي.. بلغي والدك. بس احتمال نتأخر شويه عشان ماما عندها كشف عند الدكتور و بعد ما هتخلص انشاء الله هنيجي.
ليلى: و حبك ماما تكشف اليوم ده؟
خالد: ليلى! صحه ماما اهم عندي من كل حاجة.
ليلى: انت جايبني هنا عشان كل شويه تكلمنى عن ماما ماما ايه مفيش على لسانك غير ماما.
خالد: ليلى ايه اللي انتي بتقوليه ده.
ليلى: خلاص انا اسفة... المهم متنساش المعاد يوم الخميس و خلي الست ماما تخلص الكشف بسرعة.
ـــــــــــــــــــــــــــــــــــــــــــــــــــــــــــــــــــــــــــ
المشهد الرابع:
ليلى جالسه مع والدها الاستاذ صلاح ووالدتها مدام صفية.
الام: انا سألت عن الولد ده قالولي ده باباه مات و سابله شركة استيراد و تصدير كبيرة قوي.
ليلى: ما انا عشان كده ماسكة فيه بإيدي و سناني مش حسيبه يفلت مني.
الام: لازم متسيبيهوش غير لما يجيبلك فيلا ليكي و يفتحلك شركه كبيرة.
ليلى: متخافيش عليا يا امى انا عارفه انا بعمل ايه.
الاب: حرام عليكم اللي انتم بتقولوه ده الولد زنبه ايه يقع فى ايد واحده زيك. ربنا يهديك يا خالد و يرجعك لصوابك.
الام: ايه انت مش عاوز تأمن مستقبل بنتك و تضمن لأحفادك عيشه حلوه ولا انت غاوي فقر.
الاب: انا قرفت منكم انا داخل انام بس لازم تعرفوا اني مش راضي على الجوازة دي و اعملوا اللى انتم عاوزينه خلاص انتو حرين بس حتروحوا من ربنا فين.
الام: هوا احنا هنسرق والا هنقتل احنا هنتجوز.
يدخل الاب غرفته.
ليلى: هوا ماله بابا محبكها قوي كده ليه؟
الام: هوا كده على طول غاوي فقر. سيبك منه المهم انتي حددتي مع خالد معاد ولا لأ؟
ليلى: اه هوا قاللي هاييجي يوم الخميس الجاي.
الام: ربنا يتمملك على خير يا ليلى. و تتفتح لنا طاقة القدر.
ــــــــــــــــــــــــــــــــــــــــــــــــــــــــــــــــــــــــــ
المشهد الخامس:
فى منزل ليلى تجلس والدها ووالدتها و خالد و والدته.
الاستاذ صلاح: احنا طلبتنا مش كتير يا ابني احنا عاوزين نشتري راجل يخلي باله من ليلى و زي منتا عارف دي بنتا الوحيدة.
خالد: اه اه طبعا يا عمي ليلى دي فى عنيا.
الاستاذ صلاح: و ده العشم برضو انا من اول ما شوفتك ربنا يعلم قلبي اتفتحلك اعتبرتك زي ابني تمام.
صفيه تتحدث الى رئيفه هانم: احنا بقى يا حبيبتى طلباتنا مش كتير احنا عاوزين مهر 100.000 جنيه و الشبكه طبعا سوليتير و بالنسبه للسكن ممكن ليلى تقعد مع خالد فى الفيلا لغايه ميلاقوا فيلا صغنونه ليهم و ده طبعا غير تكاليف الفرح و الجهاز. الجهاز لازم كله مستورد عشان يعيش والا انتي شايفة ايه؟
رئيفه هانم تنظر الى ابنها خالد و تكتفى بالنظرة.
خالد: هاه اه طبعا ان شاء الله انا و ليلى اتفقنا على كل حاجة. مش كده والا ايه يا ليلى.
ليلى: اه طبعا انا وخالد كنا اتكلمنا في الموضوع ده بس اللي انتي شايفاه يا امي ان شاء الله خالد حيعمله كله.مش كده والا ايه يا خالد؟
تنظر رئيفه هانم الى خالد مرة اخرى.
خالد: ان شاء الله هنحاول نرضي حضرتك يا صفية هانم

المشهد السادس:
خالد بيكتب كتابة على ليلى و بعد كده الفرح يتم و يعيشوا مع والدة خالد في الفيلا.
و بعد مرور سنة على الجواز.
خالد يجلس مع ليلى في غرفة النوم.
ليلى: خالد على فكرة مامتك بتعاملني وحش قوي و بحس ان هي كارهاني.
خالد: لأ خالص على العكس دي ماما بتحبك قوي.
ليلى: خالد.......
خالد :ايوة ياروحي.
ليلى: انا كان فى خبر كده كنت عاوزة اقولهولك.
خالد: خير يا حبيبتي في ايه؟
ليلى: خالد انا....انا حامل.
خالد يسقط كوب الشاي من يده.
خالد: انا مش مصدق نفسي معقول...... معقول هبقى اب انتي عرفتي امتى؟
ليلى: النهارده كنت عند الدكتور انا و ماما و الدكتور اكد لي اني حامل فى الشهر التاني.
خالد: دي ماما هتفرح قوي لو عرفت.
خالد يجري على اوضة والدته.
ماما......ماما..........
الام: ايه يا خالد فى ايه؟
خالد: ليلى حامل يا ماما.
الام: الحمد لله الحمد لله رب العالمين. الف مبروك يا خالد يا حبيبي انا الفرحه مش سايعاني الحمد لله.تعالى فين ليلى اباركلها بنفسى.
الام: الف مبروك يا ليلى الف مبروك يا حبيبتي.
خالد: بصي بقى يا ليلى انا مش عاوزك تتحركي من على السرير خالص و كل حاجه هتعوزيها هتجيلك لغاية عندك. انا هكلم مكتب خدمة البيوت يشوفلك شغاله تيجي تخدمك لغاية ما تقومي بالسلامة.
ليلى: و على ايه شغالة بس يا خالد.
خالد: امال ايه انتي مش ناوية تفضلي فى السرير والا ايه؟
ليلى: لأ طبعا لازم افضل فى السرير.
خالد: امال مين حيخدمك؟
ليلى: ماهي نينة (مامت خالد) موجوده والا ايه يا نينه؟
الام تنظر لليلى ثم تنظر لخالد ثم تترك الغرفه و تنصرف.
ليلى: شوفت مش بقولك مامتك بتعاملني كإنى عدوتها.
خالد: ما انتي بردو يا ليلى بتهرجي. عاوزه رئيفه هانم تيجي تخدمك!!
ليلى: زي ما هيا امك فأنا ام ابنك ولازم يكونلي اعتبار زيها و اكتر كمان.
خالد:اعتبارك ده فوق راسي بس........
ليلى: بس ايه متتكلم مش كفاية جت ضيعت علينا فرحتنا بالبيبي.
خالد: خلاص يا روحي متزعليش... خلاص بقى.. بالمناسبه السعيده دي انا و انت النهارده هنتعشى في مكان رومانسي عشان ترووقي اعصابك كده و تبدأي تهتمي بصحة البيبي.
ليلى: صحة البيبي بس؟
خالد: لأ.. صحة البيبي وصحة ام البيبي.
ليلى: يا حبيبى...................
ــــــــــــــــــــــــــــــــــــــــــــــــــــــــــــــــــــــــــ
المشهد السابع:
ليلى ووالدتها عند الدكتور.
ليلى: انت بتقول ايه يا دكتور... يعني ايه حمل كاذب؟؟!
الدكتور: احنا مكناش واثقين من الاول من الحمل بتاعك بس بعد الاشعة والتحاليل الاخيرة انا بقيت واثق انه مفيش حمل. انا آسف اني بقول كده انا عارف انه صعب عليكم.
الام: طب مفيش امل تحمل يا دكتور؟
الدكتور: بصراحه الامل ضعيف بس احنا املنا فى ربنا كبير.
الام: و نعم بالله.... طب مفيش عمليه فى مصر او برا مصر تعالج العيب الخلقي ده.
الدكتور: لغايه دلوقتى الطب متوصلش لطريقه تعالج العيب ده .. انا بصراحه مفيش حاجه فى ايدي اقدر اعملها كل الامل فى الحمل الطبيعى دلوقتي حاجه بتاعه ربنا.
الام: طب احنا متشكرين يا دكتور على تعبك معانا.
الكتور: لأ العفو.
ـــــــــــــــــــــــــــــــــــــــــــــــــــــــــــــــــــــــــــــــ
المشهد الثامن:
ليلى فى منزل والدها تجلس مع والدتها.
الام: طب هتعملي ايه مع جوزك ده ممكن ميتحملش الصدمة.
ليلى: لأ خالد بيحبني و ممكن يتقبل مني بس المشكلة فى مامته.
الام: لازم امه دي تبعد عنكم شوية عشان تعرفي تفهميه الموضوع بالراحة و تهدَيه.
ليلى: انا جاتني فكره بس سيبيني انا اتصرف.
ــــــــــــــــــــــــــــــــــــــــــــــــــــــــــــــــــــــــــ
المشهد التاسع:
خالد يجلس مع والدته فى غرفتها.
خالد: عارفة يا امي لو جاني ولد هسميه سامي و لو جاتني بنت هسميها رانيا.
الام: ربنا يهنيك بيه يا رب و يتربى فى عزك يا حبيبي.
ليلى تدخل الغرفه على فجأة...............
خالد: فى ايه يا ليلى مش تخبطي قبل ما تدخلي.
ليلى: فين علبة الميكياج بتاعتي انا مش لاقياها فى دولابي.. مين اخدها من اوضتي.. انا لازم اعرف مين الحرامي فى البيت ده.
الام: اخرسي يا ليلى البيت ده عمره ما في حاجه ضاعت منه.
تتجه ليلى نحو دولاب رئيفه هانم و تخرج منه علبة الميكياج.
ليلى: مش دي علبه الميكياج بتاعتي؟ ايه اللي جابها فى دولابك؟ عاوزة تحطي ميكياج و انتي فى السن ده؟ و بعدين لو انتي عاوزة ميكياج قولي لإبنك يجيبلك مش تاخدي علبتي. خالد انا مستنياك فى الاوضة.
خالد: انت ايه اللي خلاكى بس تاخدي علبه الميكياج بتاعتها؟
الام: خالد انت مصدقها!!!! مصدق ان امك ممكن تسرق؟
خالد: امال ايه اللى جاب العلبة دى فى دولابك؟
الام: انا مش فاكرة انا مش قادرة افتكر..........انا اليومين دول حاسة اني مش مظبوطة و اعصابي تعبانة و بنسى كتير.
خالد: انتي لازم تريحي اعصابك شوية انا ححاول الاسبوع الجاي اخد اجازة و نسافر اى حته ترتاحي هناك شوية.
الام: لأ..لأ.. انا كويسه متشغلش بالك انت.
ـــــــــــــــــــــــــــــــــــــــــــــــــــــــــــــــــــــ
المشهد العاشر:
خالد نائم و ليلى بجانبه.
ليلى: خالد انت نمت؟
خالد لا يرد.
ليلى: الحمد لله زمانه نايم فى سابع نومة. يا رب ميصحاش دلوقتي.
تقوم ليلى من على السرير و تخرج من الغرفة و تتجه الى غرفة رئيفة هانم.
ليلى تفتح باب الغرفة.
رئيفة هانم تستيقظ على صوت الباب.
رئيفه هانم: مين اللى فتح الباب؟
ليلى لا ترد و لكنها تتجه مسرعة نحو الدولاب تفتحه ثم تغلقه ثم تخرج مسرعة من الغرفه.
رئيفة هانم: ليلى انتي بتعملي ايه هنا؟ تعالي هنا انتي اخدتي ايه من دولابي؟ تعالى هنا.....
تذهب ليلى الى غرفتها ثم تصطنع النوم.
يستيقظ خالد على صوت امه.
خالد: فى ايه يا ماما؟
الام: اسأل مراتك كانت بتعمل ايه فى اوضتي؟
خالد: ليلى؟ ما هي نايمه جنبي اهيه.
ليلى تبدو و كأنها استيقظت على صوت رئيفة هانم.
ليلى: فى ايه يا خالد؟
الام: يعني مش عارفة فى ايه؟
ليلى: ايه ده انتي ايه اللي مصحيكي دلوقتي يا نينة
خالد: اهدي يا ليلى خلينا نفهم ايه اللى حصل.
الام: اسأل مراتك ايه اللى حصل.
خالد لليلى:انتي عملتي حاجة.
ليلى: انتا هتصدقها. دي اكيد بتخرف.
الام: اخرسي يا قليلة الادب.ايه يا خالد انت سايبها تشتم امك و ساكت مش هتضربها بالألم؟
خالد ساكت لايتحرك.
خالد: ماما ارجوكي انا عندي شغل بكرة الصبح بدري.
الام: انا لازم اعرف انتي اخدتي ايه من الدولاب.
ليلى: دولاب ايه انتي اكيد بيتهيألك.
خالد: ماما ارجوكي روحي نامي و بكرة الصبح نتكلم انتي لازم لازم تريحي اعصابك.
الام: خالد انا مش مجنونة. امك مش مجنونة يا خالد.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

المشهد الحادى عشر:
رئيفة هانم تجلس مع دولت صديقتها.
رئيفة: شوفتي يا دولت عاوزة تحسسني ان انا مجنونة. بس انا مش هسيبها.
دولت: يعني هتعملي ايه؟
رئيفة: انا عارفة ان النهارده عيد جوازهم. لما كنت فى المطبخ من شوية لقيتهم جايبين تورتة و حاطينها فى التلاجة. انا لو اخدت حتة من التورتة هنكد عليها و لو سألني خالد هقوله انا كان نفسي فيها.
دولت: رئيفة.. اعقلي بلاش تخربي على ابنك.
رئيفه:متخافيش عليا. انا عارفه انا بعمل ايه.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المشهد الثانى عشر:
ليلى تجلس مع خالد فى غرفة النوم
خالد: غمضي عنيكي يا حبيبتي عشان تشوفي انا جايبلك ايه.
تغمض ليلى و تفتح تجد علبه سوداء فتحتها و وجدت بداخلها خاتم الماظ جميل جداً.
ليلى: الله... ده جميل قوي. انا بقى هوريك انا جايبالك ايه. استنى عليا.
تتجه ليلى الى المطبخ.
فى المطبخ موجوده رئيفة هانم لتأكل من التورتة.
رئيفة: ايه ده ليلى جايه انا لسه مخدش حتة من التورتة.لازم ماتشوفنيش.
تغلق رئيفة هانم النور قبل دخول ليلى.
ليلى تتجه للثلاجة و تفتحها لتخرج التورتة.
ليلى: ايه ده انا سامعة صوت نفس ورايا.
تنظر ليلى خلفها لتجد رئيفة هانم واقفة و فى يدها...........السكين التى كانت ستقطع بها التورتة.
تصرخ ليلى: انتي بتعملي ايه هنا. الحقني يا خالد.... و ايه السكينة اللي فى ايدك دي انتي عاوزة تموتيني....الحقني يا خالد.
خالد يأتى للمطبخ مسرعا على صوت ليلى.
خالد: فى ايه يا ليلى؟
ليلى: مامتك واقفالي فى المطبخ و ماسكالي السكينة. عاوزة تموتني.
خالد: ماما انتي ايه اللي موقفك هنا.
رئيفة هانم تظل واقفة ولا تنطق بكلمة ولا تترك السكين من يدها.
خالد: ماما هاتي السكينه دي.. خليكي واقفة و انا هاخدها منك.
رئيفة هانم تمسك السكين بشدة و لا تريد ان تتركها.
خالد: ماما انا خالد انا خالد ابنك.. ماما هاتي السكينة عشان خاطري.
الام: هاه.. ايه... خالد.. اه خالد.. خالد مين؟.. خالد انا ماكنتش عاوزة اقتل حد.
خالد:ماما عشان خاطري هاتي السكينه دي.
خالد يأخد السكين من والدته.
خالد: تعالي ندخل الاوضة.
الام لا تتحرك.
خالد : ماما تعالي معايا.
الام: خالد انا...........انا مش قادرة احرك رجلي.
خالد: ماما........................
الام: انا اتشليت يا خالد.
خالد يصرخ: لأ...........ماما.............
ـــــــــــــــــــــــــــــــــــــــــــــــــــــــــــــــــ
المشهد الثالث عشر:
خالد يجلس مع ليلى ووالدتها.
ليلى: خالد انا كنت عاوزة افاتحك فى موضوع.
خالد: خير يا حبيبتي.
ليلى: ايه رأيك لو نينة راحت دار المسنين؟
مامتها: على فكرة دار المسنين ده مكان رائع ليها و حيهتم بعلاجها. .
ليلى: و بعدين فى نشاطات كتير هناك.
مامتها: بيطلعوا رحلات و بتقدر تتعرف على ناس كتير.
ليلى: و كمان تقدر تريح اعصابها هناك.
خالد: ايه الكلام اللى بتقولوه ده!!!........ متحاولوش انا عمري ما حودي امي المكان ده....
ليلى: على العموم فكر بس لو مامتك فضلت عايشة معانا لازم تشوفلي مكان تاني اعيش فيه...... يا انا يا هي فى البيت.
ـــــــــــــــــــــــــــــــــــــــــــــــــــــــــــــــــــــــــــ
المشهد الرابع عشر :
خالد يجلس مع والدته فى غرفتها.
خالد: ماما انا كنت عاوز اكلمك فى موضوع كده. بس خايف الا تزعلى.
الام: خير يا ابني. ربنا ميجيبش زعل ان شاء الله.
خالد: كان فى دكتور سكر كويس قوي نازل من فرنسا و حجزتلك عنده. عشان يظبطلك السكر.
الام: طب كويس و بالمرة اقول لدولت صاحبتي تيجي هيا كمان.
خالد: لأ اوعى تقولى لحد... اصل... اه.. اصل الدكتور نازل عشان يكشف على عدد معين من الحالات انا حجزتلك عنده بالعافية.
الام: خلاص مش هقول لحد. بس انت ليه كنت خايف ازعل.
خالد: ايه .. اه اه ..عشان انتى مش بتحبى تروحي تكشفي عند دكاترة يعني.
الام: اه يا ابني والله انا مش بحب كده بس مدام انت بتقول ده دكتور كويس خلاص هاجي على نفسي.
خالد: خلاص يا ماما يوم الجمعة الجاية ان شاء الله حسين صاحبي هيعدي عليكي بالعربية ياخدك للمستشفى عشان تعملي شوية تحاليل مهمة للدكتور.
الام: امال انت مش فاضي والا ايه؟
خالد: معلش يا امي انا عندي شغل مهم فى المستشفى هخلصه و هاجيلكم ان شاء الله.
الام المسكينة: ربنا يوفقك ان شاء الله. و اشوفك كده متهني قادر يا كريم.
ــــــــــــــــــــــــــــــــــــــــــــــــــــــــــــــــــ
المشهد الخامس عشر:
رئيفة هانم تركب العربية مع حسين صديق خالد.
الام: هو خالد هيخلص شغل امتى؟
حسين: هو قاللي هيخلص الساعه 9 ان شاء الله و حيجيلنا.

المشهد السادس عشر
على باب دار المسنين تقف السيارة.
حسين: هي دي المستشفى يا طنط.
الام: انت مش هتدخل معايا ولا ايه؟
حسين: لأ انا هروح دلوقتي الشركه تاني عشان ورايا شغل.
الام: طيب يا ابني.
تدخل الام الدار.
الام لنفسها: ازاى دي مستشفى امال فين الدكاترة و العيانين؟
تدخل الام غرفه المديرة.
المديرة: اهلا يا رئيفة هانم. ابن حضرتك جاه هنا و عمل كل الترتيبات اللازمه للاقامة.
الام: اقامة ايه؟؟! انا مش هبات هنا. انا حعمل التحاليل و همشي.
المديرة: تحاليل ايه يا مدام..... (و بدون شفقه) المكان ده دار مسنين.. مش مستشفى .
الام: ايه.. لأ.. لأ.. اكيد فى حاجة غلط. انا جاية هنا عشان دكتور السكر عاوز مني تحاليل.
المديرة: ممكن تهدي و تقعدي و انا هفهمك.
الام: تفهميني ايه انا لازم امشي من هنا.
المديرة: ما هو مش هينفع تمشي غير لما ييجي ابنك.
الام: انا مش مصدقة نفسي.... انا اكيد باحلم.... طب ممكن اكلمه فى التليفون؟
المديرة: ممكن اتفضلي.
الام تطلب رقم الفيلا ترد عليها ليلى.
الام: ايوه يا ليلى اديني خالد.
ليلى: خالد.. اه.. خالد... خالد مش هنا.. لسه ما جاش من الشركة.
الام: انا لازم اكلمه لما ييجي ضروري المستشفى اللي انا فيها بيقولولي انها دار مسنين و عاوزاه ييجي عشان يتصرف. انا عاوزة امشى من هنا.
ليلى: حاضر يا نينة اول ماييجي حبعتهولك.
الام تغلق سماعة التليفون.
ليلى تتحدث لخالد الذى يجلس بجوارها: كانت عاوزاك تروح تخرجها.
خالد: مسكينة يا امى.
ينهض خالد ليرتدي ملابسه و يذهب ليخرج امه.
ليلى: خالد انت بتعمل ايه؟ انت اتجننت؟ هي خلاص كمان كام يوم و هتاخد على المكان هناك.
خالد: بس بقى.. كفاية... حفضل اسمعلك لامتى؟ ضيعتي مني امي .. عاوزة ايه تاني؟
ليلى: هي كده؟ طيب انت لو نزلت من هنا اعمل حساب انك هتيجي مش هتلاقيني.
خالد: ايه اللي بتقوليه ده بس يا ليلى؟
ليلى: يا حبيبي هي خلاص حتاخد على الجو هناك ممكن تنسى بقى عشان تقضي النهارده اول ليلة نكون فيها لوحدنا فى البيت. حبيبي بلاش تفكر فى حاجه تشغل دماغك ارجوك فكر فى مستقبلك و بس.
خالد: ماهو اصل..............
ليلى: احنا قولنا ايه؟
خالد: حاضر سمعا و طاعة.
ليلى: ههههههه.. ايوة انا كده احبك.
ـــــــــــــــــــــــــــــــــــــــــــــــــــــــــــــــــــــــــــــ
فى الدار رئيفة هانم منهارة و تتحدث اليها المديرة.
المديرة: طب مفيش ارقام اي حد تثقى فيه ييجى يخرجك؟
رئيفة هانم: اه.. اه ..افتكرت... دولت صاحبتي انا عاوزة اكلم دولت تيجي هنا تخرجنى.
المديرة: طب رقمها كام دولت دي؟
رئيفة هانم: اه دولت.. اه.. رقمها.. دقيقه واحده.. ايه ؟..رقم دولت؟؟ انا مش فاكراه.. ده عمره ما تاه عن بالي....حرام....
تبكى رئيفه هانم بشده..................
المديرة: معلش يا امى متعمليش فى نفسك كده... طيب مفيش حد تاني ممكن يجيلك؟
رئيفة هانم: لأ فى.. امين اخو جوزي.
المديرة: طب فاكرة رقمه؟
رئيفه هانم: أه فاكراه ..... تسعة تسعة....
المديرة: مفيش رقم فى الدنيا كلها اوله تسعة تسعة.
رئيفة هانم: انا مش فاكرة.. انا تعبانة قوي... قوي
تبكي رئيفة هانم بكاء شديدا.............. كده يا خالد.. بقى تعمل فيه كده........ الله يسامحك يا ابني .. الله يسامحك.....
ــــــــــــــــــــــــــــــــــــــــــــــــــــــــــــــــــــ
المشهد السابع عشر:
خالد يجلس فى مكتبه فى الشركة. ليأتيه تليفون بان ليلى سقطت من على الكرسي في المطبخ بينما كانت تاتي باشياء من اعلى.و حدث لها كسر فى احدى ساقيها. و هي في المستشفى الان ولكن الدكتور لم يذكر له شيئا عن الجنين.
خالد يسرع الى المستشفى ليطمأن على ليلى. يجد الدكتور فى انتظاره و يتحدث الدكتور مع خالد عن حاله ليلى. ثم يخرج خالد من عند الدكتور. و يتجه لغرفه ليلى.
خالد: حمدلله على السلامه يا ليلى.
ليلى: شوفت اللى حصللى يا خالد.
خالد: اه ما هو الدكتور حكى لى.
ليلى: انت اتكلمت مع الدكتور؟
خالد: اه وقالي.......... قاللي على انك مش.......... مش حامل...
تسود لحظه صمت بينهم.
ليلى: خالد انت لازم تسمع مني.
خالد: اسمع ايه تاني بعد اللي قاله الدكتور؟ ايه هتعيشيني فى كدبة جديدة؟ فى وهم جديد؟. حرام عليكي. على ايدك خسرت كل حاجة. خسرت فلوسي.. و شركتي خلاص بتفلس. و خسرت امي. و دلوقتي بخسر ابني. حرام عليكي من يوم ماعرفتك و انا عمال اخسر اخسر. حرام عليكي.
ليلى: حرام عليك متظلمنيش.
خالد: اظلمك!! انت دخلتي حياتي دمرتيني. و مش عاوزاني اظلمك. انا خلاص مش عاوزك. مش عاوزك.
خالد يترك الغرفه و يخرج مسرعا.
ليلى: خالد.. يا خالد.. اعقل ارجوك يا خالد.
لبلى تتحدث لنفسها: هما يومين و هترجع تانى زي الكلب.
ــــــــــــــــــــــــــــــــــــــــــــــــــــــــــــــــــــــــــــ
المشهد الثامن عشر:
ليلى تعود للفيلا لتجد ان خالد لم يعد.
بعد يومين تسمع ليلى صوت سيارة خالد تقف امام الباب و جرس الباب يرن.
تفتح ليلى بدون ان تنظر و تقول ايه يا حبيبي؟؟ ايه اللى اخرك عليا ده كله؟؟ قلقتني عليك.
تنظر ليلى لتجد ان خالد ليس موجود... تنظر اسفل قدميها لتجد ورقه مطوية. تفتحها ليلى فإذا بها ورقة الطلاق.
ليلى تتحدث لنفسها: لأ مش ممكن... مش قادرة اصدق... خالد يعمل كده... مش قادرة اصدق نفسى... تصرخ ليلى بشدة الى ان تقع على الارض فاقدة الوعي.
ـــــــــــــــــــــــــــــــــــــــــــــــــــــــــــــــــــــــــــ
المشهد التاسع عشر:
خالد يجلس فى مكتبه يتحدث الى صديقه حسين.
حسين: احنا لو سبنا الشركه كده حتفلس بجد... العملاء عاوزين لوحدهم ما لا يقل عن مية الف جنيه.
خالد: طب انا بإيدى ايه اعمله؟؟ انا خلاص رصيدى فى البنك خلص. و بعت العربيه بتاعتي. اعمل ايه؟
حسين: طب حاول تاخد قرض من البنك بضمان الفيلا.
خالد: اه صحيح الفيلا.
حسين: هتعمل ايه يعني؟
خالد: انا حبيع الفيلا. و ممكن اشوف شقة اصغر اقعد فيها. بس المشكله ان لازم اخد موافقة ماما.
حسين: رئيفة هانم.. لأ انت ممكن تاخد منها توكيل بيع و شراء و منه تقدر تبيع الفيلا.
خالد: انا كده لازم اروحلها الدار.
حسين: مسيكنة الست رئيفة هانم انت ما زورتهاش من ساعه ما دخلت الدار.
خالد: بس انا مش حاقدر اكلمها لوحدى.
حسين: حاول تاخد عمك أمين معاك.
خالد: خلاص يوم الجمعة ان شاء الله هاخد عمي و نروحلها.
ـــــــــــــــــــــــــــــــــــــــــــــــــــــــــــــــــــــــ
المشهد العشرون و الاخير:
فى سيارة حسين يجلس حسين و خالد فى طريقهم الى الدار.
خالد: ربنا يستر و توافق خصوصا بعد ما رفض عمي أمين انه ييجي معايا.
حسين: بس انت كلمها بهداوة و هي اكيد واخدة على خاطرها منك شوية.
خالد: اه صح هيا اكيد زعلانة مني قوي بس انا ححاول ارضيها ان شاء الله.
تصل السياره الى الدار و ينزل خالد.
حسين: انا هستناك هنا.. ماشي.
خالد: طيب يا حسين... و انا ححاول ارضيها و بعدين اكلمها فى حكاية التوكيل دي.
خالد يدخل الدار و يدخل مكتب المديرة.
خالد: انا خالد عز الدين ابن رئيفة هانم عز الدين.
المديرة: اه.. اهلا خالد بيه... انت عمرك ما جيت تزور والدتك مع انك كنت بتدفعلها كل مصاريف الاقامه بتاعتها بانتظام.
خالد: اه معلش اصلي كنت مشغول شوية الفترة اللى فاتت. ممكن اقابلها دلوقتي؟
المديرة:اه طبعا ممكن.. بعد اذنك اديلها خبر انك هنا..
المديرة تذهب لغرفه رئيفة هانم.
المديرة: انا بقول لحضرتك خالد ابنك موجود بره و عاوز يقابل حضرتك.
رئيفة هانم: و انا بقولك معرفش حد بالاسم ده.
المديرة: بس هو بيقول انه ابنك.
رئيفة هانم: هو يقول اللي عاوز يقوله..... انا خالد ابني مات خلاص...
تتجه المديرة لخالد: رافضة تقابل حضرتك.
خالد: بترفض تقابلني؟ بترفض تقابل ابنها؟ ازاي؟ انا لازم ادخلها.... اوعي من قدامي...
المديرة: لو سمحت يا خالد بيه بلاش عنف عشان ما اندهش الامن..
خالد: انا قولتلك سيبيني... اوعي من وشي...
المديرة: يا اسماعيل.. يا سالم.. تعالوا طلعوا الراجل ده برا.
خالد: اوعوا كلكوا من وشى انا لازم اشوف امي.
يجري خالد متجها ناحية غرفه الام.
خالد: امي اتصورى مش عاوزيني اقابلك؟
الام: امك مين يا شاطر؟ انا مش امك... انت تايه والا حاجة؟؟
خالد: امي انا خالد مش فاكراني؟ خالد ابنك...
الام: انا ابني مات... مات خلاص...
خالد:لأ يا امي انا لسه عايش. امي انا خالد... انا اتبهدلت قوى من بعدك يا امى.
الام تتحدث الى المديرة: لو سمحتي خدوا الراجل ده من هنا... انا معرفوش انا ابني مات.... مات خلاص....
ـــــــــــــــــــــــــــــــــــــــــــــــــــ
خالد يخرج من الدار ليجد حسين فى انتظاره
حسين: ايه يا خالد؟ عملتلك التوكيل؟
خالد لا يرد و يسير للامام متجها الى البحر.
حسين: اكيد فى حاجه حصلت انا لازم اسيبه يريح اعصابه شوية و نتكلم بكره فى المكتب.
ــــــــــــــــــــــــــــــــــــــــــــــــــــــ
بعد مرور اسبوع يسأل احد اصدقاء خالد عنه فيقول لهم حسين: خالد كل يوم يروح يقعد عند البحر و بتخيل امه بتكلمه و يقعد يكلم نفسه.
ــــــــــــــــــــــــــــــــــــــــــــــــــــــــ
حسين يذهب لخالد ليطمئن عليه يجده جالسا على شاطئ البحر يكلم نفسه: ايوه يا امي انا سامعك اتكلمي.
حسين: هيا فين امك بس يا خالد؟
خالد: ماما جاتلي امبارح فى النام و قالتلي استناني هنا انا جاية......انا جاية ساعه الغروب.
خالد: ايوه يا امى انا سامعك.
صوت الام فى اذن خالد: يـــــــــــــــا خالــــــــــــــــد.
خالد: ايوة يا امى انا سامعك........ سامعك فى الغروب.. الغروب انتهى فيه النهار زى منا انتهيت.
ــــــــــــــــــــــــــــــــــــــــــــــــــــــــــــــــــــــــــــــــــــــــ
تمت بحمد الله,,,,

إيه ده يا دودو ده طويل أوي أنا ملحقش أقراه بس تسلم إيديكي

ميرسي يا قمر نورتى
ابقى اقريها لما تفضى بقى

ميرسي لردك يا راما
دى من قصه فيلم بس معمول فيها شويه تعديلات

بجد رووووووعه يادودو
تسلم ايدك بجد
حلوه بجد

ميرسي يا نيدو نورتى يا جميل

ميرسي ليك يا راما بجد نورتنى